काठमाडौँ । सरकारले राष्ट्रसेवक कर्मचारीहरूको नयाँ तलबमान स्वीकृत गरेको छ। प्रधानमन्त्री तथा मन्त्रिपरिषद्को कार्यालयले मन्त्रिपरिषद्बाट पारित नयाँ तलबमान सम्बन्धित निकायमा पठाएको हो।
अर्थ मन्त्रालयले साउन ६ गते प्रस्ताव गरेको नयाँ तलबमान मन्त्रिपरिषद्ले करिब १५ दिनपछि स्वीकृत गरेको हो। यो व्यवस्था चालु आर्थिक वर्षको बजेटअनुसार साउन महिनादेखि लागू हुनेछ।
नयाँ तलबमानअनुसार अब मुख्य सचिवले मासिक ९० हजार ५ सय ९४ रुपैयाँ तलब पाउनेछन्, जुन सरकारी सेवामा सबैभन्दा उच्च तलब हो। सबैभन्दा तल्लो तहका प्रथम स्तरका कार्यालय सहयोगीको मासिक तलब २८ हजार ९ सय ८४ रुपैयाँ कायम गरिएको छ।
यस्तै, नेपाली सेनाका प्रधान सेनापतिले पनि मुख्य सचिवसरह ९० हजार ५ सय ९४ रुपैयाँ तलब पाउनेछन्। नेपाल प्रहरीका प्रहरी महानिरीक्षक (आईजीपी) को मासिक तलब ८४ हजार ५ सय ७६ रुपैयाँ तोकिएको छ।
चालु आर्थिक वर्षको बजेटमार्फत अर्थमन्त्री स्वर्णिम वाग्लेले सरकारी कर्मचारीको आधारभूत तलबमा १० प्रतिशत वृद्धि र १० प्रतिशत प्रोत्साहन भत्ता दिने घोषणा गरेका थिए। सोही निर्णयअनुसार नयाँ तलबमान लागू गरिएको हो।
यता, पेन्सन प्राप्त गर्ने निवृत्त कर्मचारीहरूको पेन्सनमा भने १० प्रतिशत वृद्धि गरिएको सरकारले जनाएको छ।
