आर्यन खान ७ अक्टोबरसम्म हिरासतमै रहने

क्रुज सिपमा लागुऔषधसँग भेटिएका आर्यन खानलाई ७ अक्टोबरसम्म एनसीबीले हिरासतमा राख्ने भएको छ ।

नारकोटिक्स कन्ट्रोल ब्युरो (एनसीबी)ले आर्यनलाई हिरासतमा राख्न ११ अक्टोबरसम्मको मिति माग गरेको भए पनि किला कोर्टले ७ तरिखसम्मका लागि हिरासतमा राख्न आदेश दिएको हो । आर्यन अझै तीन दिन हिरासतमै रहनेछन् ।

शनिबार मुम्बईस्थित एक क्रुजमा एनसीबीले छापा मार्दा भारतीय अभिनेता शाहरुख खानका छोरा आर्यनसहित १३ जना पक्राउ परेका थिए । क्रुजमा ड्रग्स पार्टी चलिरहेको थियो । मुम्बईबाट गोवातर्फ जाँदै गरेको उक्त क्रुज पार्टीमा सहभागी हुनेहरूले टिकटबापत ८० हजारदेखि दुई लाख भारुसम्म तिरेका थिए ।

 यद्यपि, आफूले कुनै पैसा नतिरेको, ड्रग्स पनि नलिएको र केवल पाहुनाका रूपमा पार्टीमा सहभागी भएको बयान आर्यनले दिएका छन् ।