२० माघ,काठमाडौं- अछामको ढकारी गाउँपालिकाका दुई जना किशोरीको हत्यामा संलग्नलाई हदैसम्मको कानूनी कारबाही गर्न सांसदले जोडदार माग गरेका छन् । राष्ट्रिय सभाको आइतबार बसेको बैठकको शून्य समय र विशेष समयमा भाग लिएका सांसदले यस्तो माग गरेका हुन् ।
बैठकको सूरमा नै शून्य समयमा भाग लिँदै नेकपा (माओवादी केन्द्र)का सचेतक गंगाकुमारी बेल्बासेले हत्यामा संलग्न व्यक्तिलाई हदैसम्मको कानूनी कारबाही गर्न र यस्ता घटना हुन नदिनका लागि तीनै तहका सरकार सचेत बन्न सरकारको ध्यानाकर्षण गराइन् ।
उनले भनिन्, ‘अछामको ढकारी गाउँपालिकामा भएको दुई किशोरी १५ वर्षका सरस्वती खड्का र १ वर्षका इश्वरा खड्काको हत्या १५ वर्ष र १७ वर्षकै किशोरबाट भएको साबिती बयान प्रहरी समक्ष दिइएको छ । अपराधीलाई हदैसम्मको कानूनी कारवाही गर्न र यस्ता घटना हुन नदिनका लागि तिनै तहको सरकारलाई सचेत बनाउन, कानून बारे जानकारी गराउनका लागि सचेतनामूलक कार्यक्रम गर्न म सरकारलाई आग्रह गर्दछु ।’
नेकपा (एकीकृत समाजवादी)की उपाध्यक्ष समेत रहेकी राष्ट्रिय सभा सदस्य जयन्तीदेवी राईले अछामको ढकारी गाउँपालिकामा दुई जना किशोरीमाथी भएको घटनाप्रति निन्दा र भर्त्सना गरिन् ।
सांसद राईले संसदमार्फत यस्ता किसिमका घटना हुन नदिनका लािग सचेत बन्न सरकारको ध्यानाकर्षण समेत गराइन् ।
उनले भनिन्, ‘आज नाबालकको नाममा नाम खुलाइएको छैन । आज प्रेम गर्न सक्ने, बलात्कार गर्न आँट गर्ने र मार्न सक्ने मान्छेलाई नाबालक भनेर नामा खुलाइएको छैन । कि प्रंसङग प्रेम प्रस्तावकै कुरा हो । जसले विवाह गर्न नमानेपछि उनले जवरजस्ती गर्ने प्रस्ताव राख्यो, त्यो पनि अस्विकार गर्दा नमानेपछि मारियो । उनको फुपु मारिएपछि भदैनीलाई गरेको अपराध ढाकछोप गर्नका लागि मारियो । अध्यक्ष ज्यू, यस्ता किसिमका घटना हुन नदिनका लागि सचेत बन्नका लागि सरकारलाई अनुरोध गर्दछु । जवाफ पाइयोस्, सरकारले यो कुरालाई ध्यान दिनैपर्छ ।’
सांसद राईले अछाममा कहिले छाउगोठमा किशोरीले बलात्कृत भएर मृत्युवरण गर्नुपरेको त कहिले जनावरको टोकाइबाट मृत्युवरण गर्नुपरिरहेको पनि स्मरण गराईन ।
उनले अछाममा मात्रै नभएर देशभरमा यस्ता खालका घटना दिनैपिच्छे भइरहेको भन्दै किशोरीले स्वतन्त्रतापूर्वक कहिले बाँच पाउने र यस्ता किसिमका घटनाको अन्त्य कहिले हुने भन्दै प्रश्न समेत गरिन्, ‘यसैगरी देशभर नै किशोरीले अनाहकमै ज्यान गइरहेको छ । सम्माननीय अध्यक्ष ज्यू, त्यसै कारण म यो सम्मानित सदनबाट प्रश्न गर्न चाहान्छु, के आज उनीहरुको, आज यस्ता धेरै किशोरीले स्वतन्त्रपूर्वक बाँच्न पाउने कहिले र यस्ता किसिमका घटनाको अन्त्य हुने कहिले ?’
नेकपा (माओवादी केन्द्र)का प्रमुख सचेतक गोपीबहादुर अछामीले सिन्धुपाल्चोकको भोटेकोशी गाउँपालिकामा प्रेमिकालाई भेट्न गएका एक दलित समुदायको युवकमाथि गाउँलेले मिलेर हत्या गरेको विषयमा छानबिन गरेर दोषीमाथी कडा कारबाहीको माग गरे ।
उनले भने, ‘सिन्धुपाल्चोकको भोटेकोशी गाउँपालिकामा अन्दाजी २२ वर्षका दिनेश बिकको प्रेमिकालाई भेट्न जादाँ स्थानीय गाउँलेले मिलेर हत्या गरिएको भन्ने कुरा आएको छ । त्यसको सत्य तथ्य छानविन गरेर दोषीमाथी कडा भन्दा कडा कारवाहीको माग गर्दछु ।’
नेकपा (एमाले)की सांसद सुमित्रा बीसीले पनि विराटनगर महानगरपालिकामा प्रेम सम्बन्धलाई छुट्याउन नसकेका कारण खाल्डोमा गाडेर मारिएको घटनाको सत्य तथ्य छानबिन गरेर दोषीमाथि कडाभन्दा कडा कारबाही हुनुपर्ने माग गरिन् ।
उनले भनिन्, ‘मोरङको बिराटनगर महानगरपालिकाको ५ मा एक जना १४ वर्षका चन्दा यादव नाम गरेका बालिका प्रेम सम्बन्धमा परेर उनलाई मामा घरमा राखिएको र त्यो प्रेम सम्बन्धबाट छुट्याउन नसकेपछि उनलाई घर नजिकै खाल्डो खनेर गाडिएको अवस्थामा फेला पारिएको छ । यस्ता खालका खटना नियन्त्रण गर्न र दोषीलाई कडा कारवाही गर्न तथा सत्य तथ्य छानबिन गर्नका लागि संसदमार्फत गृह मन्त्रालय र सरकारको ध्यानाकर्षण गर्दछु ।’