काठमाडौं । बस कुर्दाकुर्दै ‘बस आउला कि नआउला?’ भन्दै सडकतिर हेरेर बस्नुपर्ने यात्रुको समस्या अब केही कम हुने भएको छ। काठमाडौं उपत्यकामा चल्ने सार्वजनिक बस अहिले कहाँ पुगेको छ र आफूले पर्खिरहेको ठाउँमा कहिले आइपुग्छ भन्ने जानकारी अब यात्रुले मोबाइलमै हेर्न सक्ने छन्।
संघीय राजधानी सहरी क्षेत्र सार्वजनिक यातायात परिषद्ले ‘केटीएम पब्लिक ट्रान्सपोर्ट’ मोबाइल एप सार्वजनिक गरेसँगै यात्रुले बसको वास्तविक अवस्थाबारे मोबाइलबाटै जानकारी लिन सक्ने व्यवस्था सुरु भएको हो।
बुधबार परिषद्को तेस्रो बैठकमा परिषद् अध्यक्ष तथा काठमाडौं महानगरपालिकाका कार्यवाहक प्रमुख सुनिता डंगोलले एप सार्वजनिक गरेकी हुन्।
हाल एपमा जीपीएस जडान गरिएका करिब १ हजार २ सय सार्वजनिक सवारीसाधनको लोकेसन हेर्न सकिनेछ। यात्रुले आफूले पर्खिरहेको रुटको बस कहाँ पुगेको छ, कति समयपछि आफ्नो गन्तव्य वा बस स्टपमा आइपुग्न सक्छ भन्ने जानकारीसमेत एपबाट पाउन सक्नेछन्।
यसले विशेषगरी लामो समयसम्म बस कुरेर बस्नुपर्ने, बसको अवस्थाबारे जानकारी नहुने र एउटै रुटमा कुन बस कहाँ पुगेको छ भन्ने अन्योलमा रहने यात्रुलाई सहज हुने अपेक्षा गरिएको छ। आगामी दिनमा थप सार्वजनिक सवारीसाधनलाई पनि एपमा जोड्दै सेवा विस्तार गर्ने परिषद्को योजना छ।
परिषद्ले सार्वजनिक यातायातलाई थप व्यवस्थित र यात्रुमैत्री बनाउन रात्रिकालीन बस सेवा विस्तार गर्ने, विद्यार्थीका लागि बिहानैदेखि यातायात सञ्चालन गर्ने तथा व्यवस्थित बस स्टप र पिक–ड्रप प्वाइन्ट निर्धारण गर्ने योजना पनि अघि सारेको छ।
त्यस्तै, जीपीएसमा आधारित सूचना प्रणालीलाई थप विस्तार गर्ने, नगदरहित भाडा प्रणाली लागू गर्न कानुनी तयारी गर्ने र यात्रुलाई अनिवार्य रूपमा टिकट लिएर यात्रा गर्न प्रोत्साहित गर्ने अभियान सञ्चालन गर्ने निर्णयसमेत भएको छ।
अब काठमाडौंका यात्रुले बस आउने हो कि होइन भनेर सडकतिर मात्र हेरेर बस्नुपर्ने अवस्थाबाट केही राहत पाउने अपेक्षा गरिएको छ। *बस कहाँ छ भन्ने थाहा पाउन सडकमा उभिनुपर्ने होइन, अब मोबाइल हेरे पुग्नेछ।
