काठमाडौं । नेपाली कांग्रेसको १५औँ महाधिवेशनमा सहभागी प्रतिनिधिहरूको स्वास्थ्य सुरक्षालाई ध्यानमा राख्दै महाधिवेशनस्थलमा पाँच कक्षसहितको हेल्थ डेस्क सञ्चालनमा ल्याइएको छ । आकस्मिक उपचारका लागि दुईवटा एम्बुलेन्ससमेत तयारी अवस्थामा राखिएको छ ।
महाधिवेशन आयोजक समितिअन्तर्गतको स्वास्थ्य समितिका संयोजक डा. केदारनरसिंह केसीका अनुसार महाधिवेशनस्थल खुलामञ्चको पश्चिमतर्फ पाँचवटा कक्षसहितको स्वास्थ्य डेस्क तयार गरिएको हो । डेस्कबाट प्रतिनिधिहरूलाई सामान्य स्वास्थ्य परीक्षणदेखि आकस्मिक स्वास्थ्य सेवासम्म उपलब्ध गराइनेछ ।
कांग्रेस केन्द्रीय सदस्यसमेत रहेका डा. केसीले हेल्थ डेस्क दुई सिफ्टमा सञ्चालन हुने जानकारी दिए । उनका अनुसार स्वास्थ्य डेस्कमा चिकित्सक, पारामेडिक्स तथा नर्ससहित ३० जना स्वास्थ्यकर्मी परिचालन गरिनेछ ।
हेल्थ डेस्कबाट मधुमेह तथा उच्च रक्तचापको परीक्षण, सिटामोल, जीवनजल र घाउचोटमा प्रयोग हुने औषधिलगायतका सेवा निःशुल्क उपलब्ध गराइनेछ ।
प्रतिनिधिलाई तत्काल अस्पताल लैजानुपर्ने अवस्था आएमा वीर अस्पताल, राष्ट्रिय ट्रमा सेन्टर र वसुन्धरास्थित बीपी स्मृति अस्पतालमा उपचारको व्यवस्था मिलाइएको डा. केसीले बताए । त्यसका लागि महाधिवेशनस्थलमा दुईवटा एम्बुलेन्स तयारी अवस्थामा राखिनेछन् ।
रातिको समयमा पनि स्वास्थ्य सेवा आवश्यक पर्न सक्ने भएकाले ‘अनकल ड्युटी’को व्यवस्था गरिएको छ । होटलमा बसिरहेका प्रतिनिधिलाई स्वास्थ्य समस्या देखिएमा स्वास्थ्यकर्मी होटलमै पुगेर परीक्षण तथा आवश्यक सेवा प्रदान गर्ने व्यवस्था मिलाइएको डा. केसीले जानकारी दिए ।
