अन्ततः कडा सुरक्षाका साथ राष्ट्रिय संग्रहालय, छाउनीबाट दोलखा पुर्याइएका यी मुकुटहरूलाई बिहीबार राजकीय सम्मान र परम्परागत धार्मिक विधिअनुसार पुनःस्थापना गरिएको छ ।
सदरमुकाम चरिकोटदेखि नै स्थानीय बासिन्दा, जनप्रतिनिधि र सुरक्षा निकायका प्रतिनिधिहरूको भव्य उपस्थितिमा स्वागत गरिएका यी मुकुटहरूको पुनरागमनले दोलखावासीमा नयाँ उत्साह थपेको छ । यसले दोलखाको हराएको सांस्कृतिक गौरव र जात्रालाई पुनः जीवन्त बनाउन ठूलो भूमिका खेल्ने विश्वास गरिएको छ ।
यी बहुमूल्य सम्पदाहरूलाई नेपाल फर्काउन अमेरिकास्थित नेपाली दूतावास, पुरातत्त्व विभाग र 'लस्ट आर्ट्स अफ नेपाल' जस्ता नागरिक अभियानहरूको ठूलो योगदान रहेको छ। विगत ३० वर्षदेखि यी मुकुटहरू नहुँदा दोलखाको प्रसिद्ध खड्ग जात्रा लगायतका अन्य सांस्कृतिक पर्वहरू प्रभावित भएका थिए र कलाकृतिहरू बिना नै जात्रा चलाउनु पर्ने बाध्यता थियो।
अमेरिकाको न्यूयोर्कस्थित रुबिन म्युजियम अफ आर्ट र डल्लास म्युजियम अफ आर्टमा फेला परेका यी मुकुटहरूको कूटनीतिक प्रमाणीकरण र कानुनी प्रक्रिया पूरा भएपछि मात्रै नेपाल फर्काउन सम्भव भएको हो।
यो ऐतिहासिक पुनरागमनलाई नेपालको सांस्कृतिक कूटनीतिको ठूलो सफलताका रूपमा हेरिएको छ भने यसले विदेशमा रहेका अन्य चोरिएका मूर्ति र कलाकृतिहरू स्वदेश फर्काउने अभियानमा नयाँ ऊर्जा प्रदान गरेको छ।
