काठमाडौं । छिमेकी मुलुक भारतमा सक्रिय चक्रवात ‘अर्नब’को प्रभाव नेपालमा समेत देखिन थालेको छ । यसको प्रभावले बिहीबार बिहानैदेखि काठमाडौं उपत्यकासहित देशका विभिन्न क्षेत्रमा मौसम बदली भएको छ भने वर्षा र हिमपातको सम्भावना बढेको छ ।

मौसम पूर्वानुमान महाशाखाका अनुसार चक्रवातको प्रभाव शनिबारसम्म रहने अनुमान छ । यस अवधिमा कोशी, मधेश, बागमती, गण्डकी र लुम्बिनी प्रदेशका धेरै स्थानमा वर्षा हुन सक्नेछ । त्यस्तै, उच्च पहाडी तथा हिमाली क्षेत्रमा हिमपातको सम्भावना रहेको छ । केही स्थानमा भारी वर्षा र हिमपातसमेत हुन सक्ने महाशाखाले जनाएको छ ।

मौसममा आएको परिवर्तनले जनजीवनसँगै सडक तथा हवाई यातायात प्रभावित हुन सक्ने भएकाले सतर्कता अपनाउन आग्रह गरिएको छ । वर्षाका कारण बाढी र पहिरो तथा हिमपातका कारण हिमपहिरोको जोखिमसमेत हुन सक्ने भएकाले सावधानी अपनाउनुपर्ने देखिएको छ ।

विशेषगरी उच्च पहाडी तथा हिमाली क्षेत्रमा यात्रा गर्ने पर्यटकलाई मौसमको अवस्था बुझेर मात्र यात्रा गर्न सुझाव दिइएको छ ।