52
भक्तपुर जिल्लाका विभिन्न कुखुरा फार्महरूमा पक्षीहरूमा लाग्ने घातक एभियन इन्फ्लुएन्जा अर्थात् ‘बर्डफ्लू’ संक्रमण पुष्टि भएपछि ४८ हजारभन्दा बढी कुखुरा नष्ट गरिएको छ। पशु सेवा कार्यालय भक्तपुरका पशु चिकित्सक डा. अमिक श्रेष्ठका अनुसार चाँगुनारायण र सूर्यविनायक नगरपालिकाका व्यावसायिक फार्महरूमा पालिएका पक्षीहरूमा यो रोग प्रमाणित भएको हो।
जस अन्तर्गत चाँगुनारायण नगरपालिकाका वडा नम्बर २, ८ र ९ मा रहेका फार्महरूबाट ३८,७९५ वटा कुखुरा मारिएका छन् भने सूर्यविनायक नगरपालिकाका वडा नम्बर १, ४ र ८ बाट ९,३७८ वटा कुखुरा वैज्ञानिक ढंगले नष्ट गरिएको छ। जिल्लाभर हालसम्म कुल ४८,१७३ वटा कुखुरा नियन्त्रणमा लिएर नष्ट गरिएको आधिकारिक तथ्याङ्क सार्वजनिक भएका छन्।
संक्रमण तीव्र रूपमा फैलिन नदिन पशु सेवा कार्यालयले प्रभावित फार्महरूलाई सिल गरी त्यस क्षेत्रका अण्डा, दाना र अन्य विसर्जनजन्य पदार्थ समेत सुरक्षित रूपमा खाडलमा पुर्ने कार्य सम्पन्न गरेको छ। पछिल्लो समय काठमाडौँ उपत्यकासहित देशका ११ भन्दा बढी जिल्लाहरू बर्डफ्लूको उच्च जोखिममा परेका छन्, जसका कारण समग्र पोल्ट्री व्यवसाय नै संकटमा परेको छ।
पशु सेवा विभाग र स्थानीय प्रशासनले संक्रमण प्रभावित क्षेत्रमा पशुपंक्षीको ओसारपसारमा कडा निगरानी बढाएका छन्। साथै, कुखुरा फार्म सञ्चालक तथा किसानहरूलाई जैविक सुरक्षाका उपायहरू (Biosecurity) कडा रूपमा लागू गर्न र कुखुराहरू असामान्य रूपमा बिरामी पर्ने वा मर्न थालेमा तुरुन्तै सरकारी प्रयोगशाला वा सम्बन्धित निकायमा खबर गर्न कडा निर्देशन जारी गरिएको छ।
