भूमि व्यवस्था, सहकारी तथा गरिबी निवारणमन्त्री प्रतिभा रावल जनताको गुनासो तथा चासो प्रत्यक्ष रूपमा सुन्न जिल्लातर्फ जाने भएकी छन्।
मन्त्री रावल भदौ ६ गतेदेखि केही दिन कञ्चनपुर, कैलालीलगायत सुदूरपश्चिमका विभिन्न जिल्लाको भ्रमणमा रहने कार्यक्रम छ। भ्रमणका क्रममा भूमि व्यवस्था, सहकारी तथा संघीय मामिला र सामान्य प्रशासन मन्त्रालयसँग सम्बन्धित जनगुनासो सुन्ने, सहकारी क्षेत्रका समस्या बुझ्ने तथा भूमिहीन, सुकुम्बासी र सम्बन्धित सरोकारवालासँग प्रत्यक्ष भेटघाट गर्ने कार्यक्रम रहेको छ।
भ्रमणका क्रममा सरकारले सम्बन्धित क्षेत्रमा गरिरहेका काम, आगामी योजना तथा तयारीबारे समेत स्थानीय नागरिकलाई जानकारी गराउने मन्त्री रावलको कार्यक्रम छ। मन्त्री बनेपछि रावलको यो पहिलो जिल्ला भ्रमण हो। त्यसैले उनको यो भ्रमणलाई जनतासँग प्रत्यक्ष संवाद गर्ने अवसरका रूपमा पनि हेरिएको छ।
यसअघि पूर्वाधार विकासमन्त्री सुनिल लम्सालले पनि सुदूरपश्चिमका विभिन्न जिल्लाको भ्रमण गरेका थिए। उनले दार्चुला र बैतडी पुगेर विकास निर्माणका कामको अनुगमन गरेका थिए। भ्रमणकै क्रममा सामान्य ज्वरो आएपछि उनलाई सैनिक हेलिकोप्टरमार्फत काठमाडौं फर्काइएको थियो। सामान्य स्वास्थ्य समस्याका लागि सैनिक हेलिकोप्टर प्रयोग गरिएको भन्दै उनको भ्रमणबारे आलोचनासमेत भएको थियो।
अब मन्त्री प्रतिभा रावलको सुदूरपश्चिम भ्रमणमा भने जनताले उनलाई स्वागत गर्छन् कि गुनासो र आलोचनाको सामना गर्नुपर्छ, त्यो हेर्न बाँकी छ। विशेषगरी भूमिहीन, सुकुम्बासी र सहकारी पीडितका समस्या प्रत्यक्ष सुन्ने भनिएको अवस्थामा स्थानीय जनताको प्रतिक्रिया उनको भ्रमणको महत्वपूर्ण पक्ष बन्ने देखिन्छ।
