85
काठमाडौँका तीनवटा ठुला सञ्चारगृह (मिडिया हाउस) को मुख्य प्रवेशद्वार नै थुनिएर ठप्प हुने गरी अज्ञात व्यक्तिहरूले बेवारिसे अवस्थामा निजी कारहरू तेर्स्याएपछि प्रहरीले गम्भीरताका साथ अनुसन्धान थालेको छ।
सोमबार बिहान करिब ७ बजेदेखि तीनकुनेस्थित कान्तिपुर पब्लिकेशन, बुद्धनगरस्थित अनलाइनखबर र मध्यबानेश्वरस्थित हिमालय टेलिभिजनको मूल गेटमै चाबीसमेत नराखी निजी नम्बर प्लेटका गाडीहरू बेवारिसे रूपमा छाडिएका थिए ।
गाडीहरू यसरी तेर्स्याइएका कारण सञ्चारकर्मी तथा कर्मचारीहरू कार्यालयभित्र आवतजावत गर्न र अन्य सवारीसाधन भित्र–बाहिर गराउन पूर्ण रूपमा अवरोध सिर्जना भएको थियो । घटनाबारे जानकारी पाएलगत्तै काठमाडौँ उपत्यका ट्राफिक प्रहरी कार्यालय र जिल्ला प्रहरी परिसर काठमाडौँको टोली क्रेनसहित स्थलगत रूपमा परिचालन भई ती शंकास्पद गाडीहरूलाई तानेर सिंहदरबार बग्गीखाना पुर्याएको छ र सीसीटीभी (CCTV) फुटेजका आधारमा चालक तथा सवारीधनीको खोजी तीव्र पारेको छ ।
प्रेस स्वतन्त्रता र सञ्चारगृहको सुरक्षामाथि नै गम्भीर चुनौती थप्ने गरी योजनाबद्ध रूपमा गरिएको यो अवरोधलाई नेपाल पत्रकार महासंघले 'निन्दनीय र रहस्यमय' भन्दै कडा आपत्ति जनाएको छ । महासंघका महासचिव रामप्रसाद दाहालले एक विज्ञप्ति जारी गर्दै सञ्चारमाध्यम र पत्रकारलाई त्रसित बनाउने उद्देश्यले गरिएको यो कार्यको तत्काल निष्पक्ष छानबिन गरी दोषीमाथि कडा कानुनी कारबाही गर्न सरकारसँग माग गरेका छन्।
काठमाडौँ प्रहरीका प्रवक्ता एवं प्रहरी उपरीक्षक एसपी पवनकुमार भट्टराई र ट्राफिक प्रहरी प्रमुख एसएसपी सुरेश काफ्लेका अनुसार प्रारम्भिक अनुसन्धानका क्रममा केही सवारीधनीहरूले आफूहरू काठमाडौँ बाहिर नगरकोट लगायतका क्षेत्रमा रहेको र सवारीसाधन चालकले लिएर गएको दाबी गरेका छन्। पछिल्लो समय काठमाडौँ महानगरको पार्किङ विवाद र मुगुका युवा गणेश नेपालीको आत्मदाह प्रकरणमा मिडियाले सरकार र महानगरको आलोचना गर्दै निरन्तर समाचार सम्प्रेषण गरिरहेका बेला नियोजित रूपमा भय सिर्जना गर्न यो हर्कत गरिएको हुनसक्ने आशंका गरियको छ।
