56
काठमाडौँ। सामाजिक सञ्जालमा अत्यधिक सक्रिय रहने श्रम संस्कृति पार्टीका अध्यक्ष एवं सांसद हर्क साम्पाङ आफ्नो पदीय मर्यादा र जिम्मेवार जनप्रतिनिधिको हैसियत भुलेर विवादित अभिव्यक्ति दिने कारणले पटक-पटक आलोचनाको केन्द्रमा पर्दै आएका छन्। साम्पाङले सामाजिक सञ्जालमा तथ्य पुष्टि नभएका, असंवेदनशील र भ्रामक सामग्रीहरू साझा गर्दा उनका समर्थक र आम नागरिकबिच गम्भीर असन्तुष्टि चुलिने गरेको छ।
दिनमै दर्जनौँ पटक फेसबुक र टिकटकमा पोस्ट गर्ने र आफ्ना आलोचकहरूलाई "ब्रो" भन्दै आक्रामक शब्द प्रयोग गर्ने उनको शैलीले कतिपय अवस्थामा सस्तो लोकप्रियता कमाउन डिजिटल प्लेटफर्मको दुरुपयोग गरेको र 'अल्पज्ञान खतरनाक हुन्छ' भन्दै सामाजिक सञ्जाल प्रयोगकर्ताहरूले उनको कडा आलोचना गरिरहेका छन्।
पछिल्लो समय फेसबुकले उनको आधिकारिक पेजलाई 'कम्युनिटी गाइडलाइन्स' उल्लंघन गरेको भन्दै निलम्बन समेत गरेको छ। यसका साथै, ट्राफिक नियम उल्लंघन गर्दा कारबाहीमा पर्दा त्यसलाई 'एआई जेनेरेटेड' भन्दै व्यङ्ग्य गर्नु निकै विवादित बनेको थियो।
साम्पाङले भने आफूले देश विकासका लागि लाखौँ गाली सहेर काम गर्दा पनि राज्यले अपमान गरेको र मुद्दा चलाएको गुनासो गरेका छन्। सार्वजनिक पदमा बसेको व्यक्तिले डिजिटल युगमा सूचनाको गम्भीरता र सत्यतालाई ध्यान नदिई जथाभाबी प्रस्तुत हुँदा लोकतान्त्रिक सुशासन र कानुनी विधिको उपहास हुने भन्दै समाजशास्त्री तथा राजनीतिक विश्लेषकहरूले उनको यो कार्यशैलीप्रति चिन्ता व्यक्त गरेका छन्।
