काठमाडौं । गोरखाको बूढीगण्डकी नदीमा बाढीको बहाव बढ्दै गएपछि गृहमन्त्री सुधन गुरुङले नदी तटीय क्षेत्रका बासिन्दालाई तत्काल सुरक्षित स्थानमा स्थानान्तरण हुन आग्रह गरेका छन् । उनले विशेषगरी जोखिमयुक्त क्षेत्रमा रहेका नागरिकलाई उच्च सतर्कता अपनाउन र सम्भावित जोखिमबाट जोगिन अनुरोध गरेका हुन् ।
गृहमन्त्री गुरुङले सामाजिक सञ्जाल फेसबुकमार्फत गोरखाको सिर्दिबास, जगत, सल्लेरी, खोलबेसी, माछाखोला, सोती, आर्खेत र आरुघाट क्षेत्रका बासिन्दालाई तत्काल सुरक्षित स्थानमा जान आग्रह गरेका छन् ।
उनले नेपालले फेरि अर्को भीषण बाढीको सामना गर्नुपरेको उल्लेख गर्दै आफ्नै निर्वाचन क्षेत्र गोरखाको चुमनुब्री गाउँपालिकामा बाढीले पुर्याएको क्षतिबारे गम्भीर ध्यानाकर्षण भएको बताएका छन् ।
गुरुङका अनुसार चुमनुब्री गाउँपालिका–३ स्थित न्याक्चेत र फिलिम बजार जोड्ने पुल बाढीले बगाएको छ । त्यस्तै, घट्टेखोला क्षेत्रमा केही घरभित्र लेदोसहितको पानी पसेको र बूढीगण्डकी नदीको बहाव निरन्तर बढिरहेको खबर प्राप्त भएको उनले बताएका छन् ।
यसैबीच, चुमनुब्री गाउँपालिका–६ भएर बग्ने उङगिलुङ खोलामा आएको बाढी बूढीगण्डकीमा मिसिँदा चार जना सम्पर्कविहीन भएका छन् । राष्ट्रिय समाचार समिति (रासस)का अनुसार उङगिलुङ खोला किनारमा रहेका चार वटा गोठ र त्यहाँ बाँधिएका १५ वटा याक तथा नाकसमेत बाढीले बगाएको छ । पशुको हेरचाहमा बसेका चार जना सम्पर्कविहीन भएका हुन् ।
बाढीले धार्चे गाउँपालिका जोड्ने माछीखोला पुल पनि बगाएको छ भने माछीखोला बजारमा क्षति पुगेको छ । त्यस्तै, आरुघाटको सोती र मान्बु जोड्ने पुलसमेत बाढीले बगाएको छ ।
गृहमन्त्री गुरुङले घटनालगत्तै उद्धार, राहत तथा जोखिममा रहेका नागरिकलाई सुरक्षित स्थानमा स्थानान्तरण गर्न नेपाल प्रहरी, सशस्त्र प्रहरी बल र स्थानीय प्रशासन परिचालन गरिएको बताएका छन् । उनका अनुसार उद्धार तथा स्थानान्तरणका लागि हेलिकप्टरसमेत घटनास्थलमा परिचालन भइसकेका छन् ।
उनले प्रभावित क्षेत्रका बासिन्दालाई धैर्य राख्न, उच्च सतर्कता अपनाउन र सुरक्षित स्थानमा बस्न आग्रह गरेका छन् । साथै, कुनै पनि आपत्कालीन सहायता आवश्यक परे गृह मन्त्रालयमा सम्पर्क गर्न अनुरोध गरेका छन् ।
