काठमाडौं । विश्वकै ठूलो क्रिप्टोकरेन्सी एक्सचेन्ज बिनान्समाथि भएको साइबर आक्रमणबाट करिब ६.३ अर्ब अमेरिकी डलर बराबरको डिजिटल सम्पत्ति प्रभावित भएको छ। कम्पनीले यसलाई आफ्नो इतिहासकै ठूलो साइबर आक्रमण भनेको छ।
बिनान्सका अनुसार आक्रमणबाट प्रभावित सम्पत्तिमध्ये करिब आधा रकम अन्य क्रिप्टो प्लेटफर्मको सहयोगमा रोक्का गरिएको छ। ग्राहकले बेहोर्नुपर्ने सम्पूर्ण आर्थिक क्षति कम्पनीले नै व्यहोर्ने प्रतिबद्धता पनि जनाएको छ।
प्रारम्भिक अनुसन्धानमा कम्पनीका एक इन्जिनियरको ल्यापटप ह्याक गरी आक्रमणकारीले अनधिकृत पहुँच बनाएको देखिएको छ। त्यसैको माध्यमबाट डिजिटल सम्पत्ति निकालिएको प्रारम्भिक निष्कर्ष छ।
क्रिप्टो अनुसन्धान संस्था टीआरएम ल्याब्स र चेनालाइसिसले यस आक्रमणमा उत्तर कोरियाली ह्याकर समूह 'ट्रेडरट्रेटर' संलग्न रहेको आशंका गरेका छन्। यही समूह सन् २०२५ मा बाइबिट एक्सचेन्जबाट १.५ अर्ब डलर चोरी भएको घटनासँग पनि जोडिएको थियो।
आक्रमणपछि टिथर र सर्कलले चोरीसँग सम्बन्धित क्रमशः १.६ अर्ब डलरको यूएसडीटी र ८० करोड डलरभन्दा बढीको यूएसडीसी रोक्का गरेको जनाएका छन्।
बिनान्सकी सहप्रमुख कार्यकारी ही यीले सुरक्षा सुनिश्चित नभएसम्म रकम निकाल्ने सुविधा अस्थायी रूपमा बन्द गरिएको बताएकी छन्। कम्पनीले आक्रमणकारीको पहिचान र कानुनी कारबाहीका लागि सम्बन्धित निकायसँग सहकार्य गरिरहेको जनाएको छ।
ह्याकिङको खबर सार्वजनिक भएपछि बिटक्वाइनको मूल्य ४ प्रतिशतभन्दा बढीले घटेको छ। इथरियम र सोलानालगायत अन्य प्रमुख क्रिप्टोकरेन्सीको मूल्यमा समेत गिरावट आएको छ।
सन् २०१७ मा स्थापना भएको बिनान्सका विश्वभर ३० करोडभन्दा बढी दर्ता भएका प्रयोगकर्ता छन्। घटनाले विश्वव्यापी क्रिप्टोकरेन्सी बजारमा डिजिटल सम्पत्तिको सुरक्षा र साइबर जोखिमबारे पुनः गम्भीर प्रश्न उठाएको छ।
स्रोत : बिनान्सको प्रतिवेदन तथा बीबीसीमा प्रकाशित विवरण।
