काठमाडौं । नेकपा एमालेबाट निर्वाचित भएर पार्टी परिवर्तन गरेका चार जना स्थानीय तहका जनप्रतिनिधि पदमुक्त भएका छन्। एमालेको सिफारिसका आधारमा निर्वाचन आयोगले शुक्रबार सूचना जारी गर्दै उनीहरू पदमुक्त भएको जानकारी गराएको हो।
पदमुक्त हुनेमा लुम्बिनी प्रदेशको कपिलवस्तुस्थित विजयनगर गाउँपालिकाकी उपाध्यक्ष लक्ष्मीकुमारी चौधरी र सोही गाउँपालिका–५ का वडाध्यक्ष अनवर मोहम्मद मुसलमान छन्। उनीहरू एमाले छाडेर राष्ट्रिय स्वतन्त्र पार्टी (रास्वपा) मा प्रवेश गरेका थिए। चौधरी यसअघि पनि गाउँपालिका उपाध्यक्षमा निर्वाचित भएकी थिइन्। उनले दुई कार्यकाल उपाध्यक्षको जिम्मेवारी सम्हालेकी थिइन्।
त्यसैगरी, कोशी प्रदेशको भोजपुर नगरपालिकाकी उपप्रमुख निर्मला शेर्पा र वडा नम्बर ८ का वडाध्यक्ष नवीन प्रधान पनि पदमुक्त भएका छन्। उनीहरू दुवै जना श्रम संस्कृति पार्टीमा आबद्ध भएका थिए। शेर्पा र प्रधानले बिहीबार मात्रै आफूहरूले पदबाट राजीनामा दिएको घोषणा गरेका थिए।
२०७९ सालको स्थानीय तह निर्वाचनमा एमालेबाट उम्मेदवार बनेर निर्वाचित भएका उनीहरूले पार्टी परिवर्तन गरेपछि एमालेले कारबाही प्रक्रिया अघि बढाएको थियो। पार्टीको विधानविपरीत कार्य गर्दै दल त्याग गरेको ठहरसहित एमाले केन्द्रीय सचिवालयले उनीहरूलाई कारबाही गर्ने निर्णय गरेको थियो।
सोही निर्णयका आधारमा एमालेले निर्वाचन आयोगलाई जानकारी गराउँदै पदमुक्त गर्न सिफारिस गरेको थियो। आयोगले पार्टीको सिफारिसअनुसार सूचना जारी गरेपछि चारै जनप्रतिनिधिको पद रिक्त भएको हो।
स्थानीय तह निर्वाचनमा राजनीतिक दलबाट निर्वाचित जनप्रतिनिधिले दल त्याग गरेमा सम्बन्धित दलको सिफारिस र प्रचलित कानुनी प्रक्रियाअनुसार पद रिक्त हुने व्यवस्था छ। यस घटनाले स्थानीय तहमा निर्वाचित जनप्रतिनिधिले पार्टी परिवर्तन गर्दा पदमा पर्ने प्रभावलाई फेरि चर्चामा ल्याएको छ।
