काठमाडौँ । हुन्डाई मोटर इन्डियाले अक्टोबर २०२६ का लागि आफ्ना विभिन्न कार मोडलमा विशेष छुट तथा अफर सार्वजनिक गरेको छ। कम्पनीले ग्रान्ड आई१० निओस, आई२०, अउरा, भर्ना, एक्स्टर, भेन्यू, क्रेटा, क्रेटा एन लाइन, क्रेटा इलेक्ट्रिक र अल्काजारमा ग्राहक लक्षित विभिन्न लाभ उपलब्ध गराएको हो।
कम्पनीका अनुसार अफरअन्तर्गत नगद छुटसँगै एक्सचेन्ज तथा स्क्र्यापेज बोनस, अपग्रेड बेनिफिट र नवरात्रि बुकिङ अफर समावेश गरिएको छ।
यो अवधिमा सबैभन्दा बढी लाभ क्रेटा एन लाइनमा उपलब्ध छ। कम्पनीले उक्त मोडलमा अधिकतम १.२५ लाख भारतीय रुपैयाँसम्मको बेनिफिट दिने जनाएको छ। यसमा नगद छुट, एक्सचेन्ज बेनिफिट, स्क्र्यापेज बोनस, अपग्रेड अफर र नवरात्रि बुकिङ बोनसका साथै ग्रामीण क्षेत्रका ग्राहकका लागि थप सुविधा समेटिएको छ।
नियमित क्रेटामा भने भेरियन्टअनुसार अधिकतम १.१५ लाख भारतीय रुपैयाँसम्मको छुट तथा अन्य सुविधा उपलब्ध गराइएको छ। यस्तै, क्रेटा इलेक्ट्रिकमा पनि भेरियन्टअनुसार ५० हजारदेखि ६५ हजार भारतीय रुपैयाँसम्मका विभिन्न बेनिफिट प्रदान गरिने कम्पनीले जनाएको छ।
प्रविधि र इन्जिनतर्फ क्रेटा पेट्रोल तथा डिजेलमा १.५ लिटरका इन्जिन विकल्प उपलब्ध छन्। क्रेटा एन लाइनमा १.५ लिटर टर्बो पेट्रोल इन्जिन जडान गरिएको छ, जसले १६० पीएस पावर र २५३ एनएम टर्क उत्पादन गर्छ।
त्यस्तै, क्रेटा इलेक्ट्रिकमा ४२ किलोवाट–घण्टा र ५१.४ किलोवाट–घण्टाका दुई ब्याट्री विकल्प दिइएको छ। यी ब्याट्रीले क्रमशः ३९० किलोमिटर र ४७३ किलोमिटरसम्मको दाबी गरिएको रेन्ज प्रदान गर्ने कम्पनीको भनाइ छ।
