कार्तिक,काठमाडौं। नेपाल जेसीज वर्ष २०२६ का लागि राष्ट्रिय अध्यक्ष पदमा जेसी जीवन कार्कीले उम्मेद्धारी घोषणा गरेका छन् । उनी जेसीजका अनुभवी र सक्रिय नेताका रुपमा परिचित छन् । उनी वर्ष २०२६ का लागि उनी रामेछाप जेसीजका आधिकारिक उम्मेदवारका रूपमा प्रतिस्पर्धामा उत्रिएका हुन् ।
कार्कीले आफ्नो उम्मेद्धारी अभियानलाई ‘प्रोजेक्ट सङ्कल्प २०२६ एकताको सङ्कल्प, रूपान्तरणको यात्रा’ नाम दिएका छन् । सो अभियानको मूल नारा ‘लक्ष्य राखौँ, कार्य गरौँ, सफलता हासिल गरौँ’ रहेको छ ।
उनका अनुसार नेतृत्व पद होइन, जिम्मेवारी र रूपान्तरणको प्रक्रिया हो । ‘स्पष्ट लक्ष्य बनाएर दृढताका साथ अघि बढे मात्रै साझा सफलता सम्भव हुन्छ,‘ उनले भने ।कार्कीले जनकपुरमा हुने नेपाल जेसीजको ५२ औँ राष्ट्रिय अधिवेशनमा आफ्नो दृष्टि, रणनीति र कार्य योजना प्रस्तुत गर्ने तयारी गरेका छन् ।
सङ्गठनभित्र एकता र साझा दृष्टिकोण स्थापना, पारदर्शिता र जवाफदेहीतालाई संस्थागत बनाउने ,युवा नेतृत्व विकास र महिला सशक्तीकरणमा जोड ,अध्यायबिच सहकार्य र साझा प्रगति सुदृढ गर्ने र नेपाल जेसीजलाई राष्ट्र निर्माणमा प्रेरक सङ्गठनका रूपमा स्थापित गर्ने सङ्कल्पका प्रमुख उद्देश्यसहित उनी उम्मेद्धारीको तयारी गरिहरहेका छन् ।
रामेछापबाट जेसीज यात्रा सुरु गरेका कार्की सन् २०१५ मा सदस्य बनेका थिए । उनले क्रमशः २०२१ मा शाखा अध्यक्ष, २०२२ मा राष्ट्रिय उपाध्यक्ष र २०२३ मा कार्यकारिणी उपाध्यक्षको जिम्मेवारी सम्हालेका थिए । ५१ औँ अधिवेशनमा अध्यक्ष पदका उम्मेदवार बनेका बेला उनले ‘मन जिते तर मतले हारे’ भन्ने उपमा पाएका थिए ।
