काठमाडौं,
राष्ट्रिय स्वतन्त्र पार्टी (रास्वपा) का प्रभावशाली नेता एवं सांसद सुधन गुरुङ पुन: देशको गृहमन्त्री बन्ने भएका छन्।सम्पत्ति विवरण र विवादित व्यापारिक साझेदारीको आरोप लागेपछि नैतिक जिम्मेवारी लिँदै गत वैशाख ९ गते राजीनामा दिएका गुरुङलाई विशेष छानबिन समितिले निर्दोष ठहर गरेपछि उनी सिंहदरबार फर्किन लागेका हुन्।
प्रधानमन्त्री बालेन्द्र शाह (बालेन) को सिफारिसमा आज मंगलबार दिउँसो ठीक ३ बजे राष्ट्रपति भवन (शीतल निवास) मा उनको पद तथा गोपनीयताको शपथ ग्रहण कार्यक्रम तय भएको छ।
गठित ३ सदस्यीय विशेष छानबिन समितिले गुरुङको धनकुटा, चितवन र गोरखाको पुर्ख्यौली सम्पत्ति तथा बिमा कम्पनीहरूमा भएको सेयर लगानीको विस्तृत अनुसन्धान गरेको थियो।समितिको ४५ पानाको अन्तिम प्रतिवेदनले उनका सम्पूर्ण चल-अचल सम्पत्तिको स्रोत वैध रहेको र उनीमाथि लागेका आरोपहरू पुष्टि हुन नसकेको भन्दै पूर्ण रूपमा सफाइ (क्लीन चिट) दिएको हो।
उनी औपचारिक तामझाम भन्दा पनि तत्काल जनसरोकार र सुशासनका काममा केन्द्रित हुन चाहेको भन्ने स्पष्ट छ।संसद्को वर्तमान गतिरोध र प्रतिपक्षको आन्दोलनका बीच गृह प्रशासन सम्हाल्न लागेका गुरुङको यो दोस्रो इनिङलाई राजनीतिक वृत्तमा निकै चासोका साथ हेरिएको छ।
