कात्तिक, जनकपुरधाम । मधेश प्रदेशमा नेकपा एमाले संसदीय दलका नेता सरोजकुमार यादवलाई रातारात होटलबाट मुख्यमन्त्री बनाएको प्रकरणमा नेपाली काँग्रेससहित सात दल सर्वोच्च अदालत जाने भएका छन् ।
संविधानको धारा १६८ को उपधारा ३ बमोजिम यादवलाई मुख्यमन्त्री नियुक्त गरेको भन्दै सात राजनीतिक दलहरूले सर्वोच्च अदालतमा रिट दायर गर्ने भएका हुन् । सोमबार बिहान बसेको सात राजनीतिक दलको बैठकले प्रदेशसभाको बहुमतलाई बेवास्ता गर्दै संविधानविपरीत मुख्यमन्त्री बनाएको विरोधमा बहुमत प्रदेशसभा सदस्यहरूको हस्ताक्षरसहित सर्वोच्च अदालतमा रिट निवेदन दिने निर्णय भएको कांग्रेस संसदीय दलका नेता कृष्णप्रसाद यादवले बताए ।
यादवले ७ दलका ७४ प्रदेशसभा सदस्यहरूको हस्ताक्षरसहित सर्वोच्च जान लागिएको बताएका छन् । तत्कालीन मुख्यमन्त्री जितेन्द्र सोनलले प्रदेश सभामा बहुमत लिन नसक्दा आइतबार राजीनामा दिए । उनले विश्वासको मत नमागी २५ दिनमै राजीनामा दिए । आइतबार कांग्रेस, माओवादी केन्द्र, नेकपा एकीकृत समाजवादी, लोकतान्त्रिक समाजवादी पार्टी, जनमत, जनता समाजवादी पार्टी र नागरिक उन्मुक्ति पार्टीले संविधानको धारा १६८ (२) बमोजिम सरकार गठन अघि बढाउन माग गरेका थिए ।
तर प्रदेश प्रमुख सुमित्रा सुवेदी भण्डारीले सोमबार बिहानै बर्दिबासको पानस होटलमा संविधानको धारा धारा १६८ ९३० बमोजिम प्रदेशसभाको ठूलो दलको हैसियतमा एमाले संसदीय दलका नेता यादवलाई मुख्यमन्त्री नियुक्त गरेकी थिइन् । उनले यादवलाई शपथसमेत त्यही होटलमा खुवाएपछि विरोध सुरू भएको थियो । एउटा समूहले जनकपुरधामस्थित मधेश प्रदेशको कार्यालय पनि तोडफोड गरेका छन् ।
