नेपाली सेयर बजारमा हिजो देखिएको हरियाली आज (मंगलबार) टिक्न सकेन। सोमबार ३८ अंकले बढेर लगानीकर्तामा आशा जगाएको नेप्से, आज फेरि ठूलो अंकले ओरालो लागेको छ। के बजारले आफ्नो लय गुमाउन लागेको हो? कि यो केवल एउटा सामान्य 'करेक्सन' मात्र हो।
आज मंगलबार, नेप्से परिसूचक ३९.४४ अंकले घटेको छ। यो भनेको अघिल्लो दिनको तुलनामा १.४१ प्रतिशतको गिरावट हो। आजको कारोबार बन्द हुँदा समग्र नेप्से परिसूचक २७४४.४० को विन्दुमा झरेको छ। अचम्मको कुरा के छ भने, हिजो सोमबार जति अंकले बजार बढेको थियो, आज लगभग त्यति नै अंकले बजार घटेको छ। यसले बजारमा अहिले पनि 'भोलाटालिटी' अर्थात् अस्थिरता कायम रहेको प्रष्ट पार्छ।
अब हेरौँ आजको कारोबारको भित्री विवरण। आज कुल २५१ वटा कम्पनीको सेयर मूल्य ओरालो लागेको छ भने मात्र १३ वटा कम्पनीले आफ्नो मूल्य जोगाउन सफल भएका छन्। ५ वटा कम्पनीको मूल्य भने स्थिर रह्यो। कारोबार रकमलाई हेर्ने हो भने, आज ४ अर्ब ६६ करोड ५० लाख रुपैयाँ बराबरको सेयर किनबेच भएको छ। हिजो सोमबार ४ अर्ब ३१ करोडको कारोबार भएको थियो, त्यसैले कारोबार रकममा भने आज खासै ठूलो फेरबदल देखिएको छैन। आज दिनभरिमा कुल ६२ हजार ५१२ पटक सेयर किनबेच हुँदा १ करोड ६ लाख कित्ता भन्दा बढी सेयरको हातबदल भएको छ।
उप-समूह तर्फको कुरा गर्दा, आज 'सामुहिक लगानी कोष' बाहेक अरु सबै उप-समूहहरू राताम्मे देखिएका छन्। सबैभन्दा बढी गिरावट कुन क्षेत्रमा भयो त? आज सबै सेक्टरमा बिक्री चाप बढेको देखिन्छ। लगानीकर्ताहरूले नाफा सुरक्षित गर्न खोज्दा वा थोरै डराउँदा बजारले ओरालो यात्रा तय गरेको विज्ञहरूको भनाइ छ। यद्यपि, ४ अर्ब माथिको कारोबार टिकिरहनुले बजारमा अझै पनि लगानीकर्ताको उपस्थिति बलियो छ भन्ने बुझाउँछ।
अन्त्यमा, सेयर बजारमा उतारचढाव त स्वभाविक नै हो। तर २७४४ को यो विन्दु आगामी दिनमा कता मोडिएला? के २७०० को विन्दुले सपोर्ट देला त?भोलिको बजार कस्तो रहला?
