नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’को निर्वाचन क्षेत्र रुकुम पूर्वमा पार्टीभित्रको आन्तरिक विवाद फेरि चर्किएको छ ।
पार्टी केन्द्रले गरेको पछिल्लो निर्णयलाई लिएर जिल्ला तहका नेता तथा कार्यकर्ता विभाजित भएका छन् । जिल्ला इन्चार्ज र संयोजकको जिम्मेवारी पुरानै नेताहरूलाई दिइएपछि विवाद बढेको एक नेताले बताए ।
ती नेताका अनुसार शनिबार नेकपाका केन्द्रीय सदस्य पूर्ण घर्ती समूहले खाबाङ बगरमा छुट्टै भेला आयोजना गरेको थियो । जिल्ला समितिमा बहुमत जुटाउन नसकेपछि उक्त समूहले समानान्तर समिति गठनको प्रयास गरेको उनको दाबी छ ।
‘पार्टी एकतापछि इन्चार्ज तेजबहादुर ओली र संयोजक कुमारी बराललाई जिम्मेवारी दिइयो । पुरानै टिमलाई निरन्तरता दिइएपछि विवाद बढेको हो । यो स्थानीयस्तरको विवाद हो,’ ती नेताले भने ।
केन्द्रीय सदस्यहरू होमप्रकाश श्रेष्ठ ‘हिमाल’, जितमान पुन ‘मार्सल’, पुनिराज घर्ती ‘रामेश’ र रवि बुढा ‘निर्माण’ लगायतका नेताहरू पार्टीको पछिल्लो निर्णयप्रति असन्तुष्ट रहेको बताइएको छ ।
शनिबार भएको भेलामा सहभागी नेताहरूले पार्टी नेतृत्व र पछिल्ला निर्णयको आलोचना गरेका थिए । उक्त समूहले जिल्ला कमिटी बैठक बहिष्कार गर्ने निर्णयसमेत गरेको बताइएको छ ।
यता, संस्थापन पक्षले जिल्ला कमिटी बैठकमा सहभागी नभए कारबाही गर्ने चेतावनी दिएको बुझिएको छ । पार्टीभित्रको विवादबारे सम्बन्धित पक्षको औपचारिक धारणा भने सार्वजनिक भएको छैन ।
