काठमाडौं । रिलायन्स स्पिनिङ मिल्स लिमिटेडले आर्थिक वर्ष २०८२/८३ को मुनाफाबाट सेयरधनीलाई ३० प्रतिशत नगद लाभांश वितरण गर्ने निर्णय गरेको छ।
बिहीबार काठमाडौंमा सम्पन्न कम्पनीको साधारणसभाले सञ्चालक समितिबाट प्रस्तावित लाभांश पारित गरेको हो। कम्पनीको चुक्ता पुँजी १ अर्ब ९० करोड रुपैयाँको ३० प्रतिशत अर्थात् ५७ करोड रुपैयाँ लाभांश वितरण गरिनेछ। उक्त रकममा प्रचलित कानुनअनुसार लाग्ने करसमेत समावेश छ।
साधारणसभाले आर्थिक वर्ष २०८२/८३ को वार्षिक प्रतिवेदन र लेखापरीक्षण गरिएको वित्तीय विवरणसमेत पारित गरेको छ।
सभाले कम्पनीको व्यवसाय विस्तार गर्ने योजनालाई पनि स्वीकृति दिएको छ। संशोधित प्रबन्धपत्रअनुसार कम्पनीले अल्लो, हेम्प र केरालगायत प्राकृतिक फाइबरबाट धागो उत्पादन गर्ने, कपडा तथा गार्मेन्ट उत्पादन गर्ने र फाइबर, धागो तथा कपडाको रङ्गाई गर्ने योजना अघि बढाउनेछ।
कम्पनीले आधुनिक प्रविधिको प्रयोगमार्फत प्राकृतिक स्रोतमा आधारित उत्पादन विस्तार गर्दै व्यवसाय विविधीकरण गर्ने लक्ष्य लिएको छ।
साधारणसभाले सञ्चालक समितिको संरचनामा परिवर्तन गर्दै छ सदस्यीय समिति बनाउने व्यवस्था पनि पारित गरेको छ। संस्थापक सेयरधनी समूहबाट पवन कुमार गोल्याण, शशीकान्त अग्रवाल, अक्षय गोल्याण र किरण देवी अग्रवाल सञ्चालकमा सर्वसम्मत निर्वाचित भएका छन्।
त्यस्तै, सर्वसाधारण सेयरधनी समूहबाट बसन्त नाहटा निर्विरोध निर्वाचित भएका छन् भने स्वतन्त्र सञ्चालकमा वरिष्ठ अधिवक्ता हरिश्चन्द्र सुवेदीको नियुक्ति अनुमोदन गरिएको छ।
