नेपालमा सहकारी ठगीको मुद्दाले राजनीतिक वृत्तमा फेरि एउटा ठूलो भूकम्प ल्याएको छ। रवि लामिछाने नेतृत्वको राष्ट्रिय स्वतन्त्र पार्टी (रास्वपा) का सांसद र नेताहरू फेरि एकपटक सहकारीकै मुद्दामा अनुसन्धानको घेरामा तानिएका छन्। यसपटक चर्चामा छन् स्याङ्जा क्षेत्र नम्बर १ बाट निर्वाचित रास्वपाका प्रतिनिधिसभा सदस्य डा. धनञ्जय रेग्मी का स्वकीय सचिव अर्थात् पर्सनल सेक्रेटरी बोधराज रेग्मी विरुद्ध प्रहरीले पक्राउ पुर्जी नै जारी गरेपछि राजनीतिक बजार तातेको छ। आफ्नै दाहिने हात मानिने स्वकीय सचिव फरार भएपछि सांसद धनञ्जय रेग्मीलाई तनाव बढेको छ।
पोखराको चर्चित मित्र मिलन बचत तथा ऋण सहकारी संस्थाको रकम अपचलन र ठगी भएको मुद्दामा कास्की प्रहरीले लामो समयदेखि अनुसन्धान गरिरहेको छ। यही अनुसन्धानको क्रममा कास्की प्रहरीले जिल्ला अदालत पोखरामार्फत एकैपटक २६ जना विरुद्ध पक्राउ पुर्जी जारी गर्यो। र, अचम्मको कुरा के छ भने, त्यो २६ जनाको सूचीमा रास्वपा स्याङ्जाका प्रभावशाली युवा नेता तथा सांसद धनञ्जय रेग्मीका स्वकीय सचिव बोधराज रेग्मीको नाम पनि अग्रपंक्तिमा देखियो।
प्रहरीका अनुसार बोधराज रेग्मीले मित्र मिलन सहकारीबाट मोटो रकम ऋण लिएका थिए। तर, लामो समयसम्म ताकेता गर्दा, पत्र काट्दा पनि उनले न त ऋण तिरे, न त प्रहरीको सम्पर्कमा नै आए। अन्ततः सहकारीको रकम हिनामिना र बचतकर्ताको पैसा अपचलन गरेको अभियोगमा उनीविरुद्ध कानूनी डण्डा बर्सिएको छ।
स्याङ्जा पुतलीबजार नगरपालिका वडा नम्बर ५ का बासिन्दा बोधराज रेग्मी रास्वपाभित्रका एउटा 'राइजिङ' नेता हुन्। चुनावका बेला डा. धनञ्जय रेग्मीलाई जिताउन उनले सहयोग गरेका थिए। चुनाव जितेपछि सांसद रेग्मीले उनलाई आफ्नो स्वकीय सचिव जस्तो जिम्मेवार पद दिएका थिए।
तर जब प्रहरीले बोधराज विरुद्ध पक्राउ पुर्जी जारी गर्यो, उनी रातारात फरार भए। रास्वपाका सांसदका स्वकीय सचिव नै फरार भएपछि अहिले प्रश्न सांसद धनञ्जय रेग्मी माथि पनि उठ्न थालेको छ। के यो रकम अपचलनमा सांसद रेग्मीको पनि कुनै संलग्नता वा छहारी थियो? वा आफ्ना स्वकीय सचिवको यस्तो धन्दाबारे उनी अनभिज्ञ थिए? प्रहरीले अहिले यो पाटोमा पनि सूक्ष्म अनुसन्धान गरिरहेको आशंका गरिएको छ। आफ्नै नजिकको मान्छे फरार भएपछि र पार्टीभित्रै नैतिकताको प्रश्न उठेपछि अहिले सांसद रेग्मीलाई ठूलो मानसिक र राजनीतिक तनाव बढेको बुझिएको छ।
पछिल्लो समय राष्ट्रिय स्वतन्त्र पार्टी (रास्वपा) का नेताहरूका लागि 'सहकारी' शब्द नै एउटा अभिशाप जस्तो बन्न पुगेको छ। पार्टीका सभापति रवि लामिछाने आफैँ पनि विभिन्न सहकारीको रकम गोर्खा मिडियामा अपचलन भएको मुद्दामा अनुसन्धान र अदालती प्रक्रियाको सामना गरिरहेका छन्। यस्तो संवेदनशील समयमा, फेरि अर्का बहालवाला सांसद डा. धनञ्जय रेग्मीको सचिवालय नै सहकारी ठगीमा जोडिनुले रास्वपाको "क्लिन इमेज" माथि सर्वसाधारणले प्रश्न उठाउन थालेका छन्। सामाजिक सञ्जालमा अहिले 'सुशासनको नारा दिने पार्टीका नेताहरू नै किन बारम्बार सहकारीमै जोडिन्छन्?' भन्दै तीव्र आलोचना भइरहेको छ।
मित्र मिलन सहकारीकै कुरा गर्दा, यसअघि पनि पोखराका केही वडाध्यक्ष र ठूला पदाधिकारीहरू यसै मुद्दामा समातिइसकेका छन्। त्यसैले प्रहरीले यसपटक कुनै पनि राजनीतिक दबाबमा नपरी निष्पक्ष छानबिन गर्ने अडान लिएको छ।
कानूनको नजरमा कोही पनि सानो वा ठूलो हुँदैन। चाहे उनीहरू कुनै पार्टीका नेता हुन् वा सांसदका स्वकीय सचिव, गरिब बचतकर्ताको रगत-पसिनाको पैसा फिर्ता हुनैपर्छ र दोषीले सजाय पाउनैपर्छ। बोधराज रेग्मी अहिले प्रहरीको नजरमा फरार छन्, तर उनलाई लुकाएर वा भागेर यो मुद्दा सामसुम हुने देखिँदैन। आफ्ना स्वकीय सचिवमाथि लागेको यो गम्भीर आरोपबारे सांसद धनञ्जय रेग्मीले संसद र जनतासामु के प्रष्टीकरण दिनेछन् अनि रास्वपाले आफ्ना नेताहरू जोडिएका यस्ता मुद्दामा कस्तो एक्सन लिनेछ? त्यो भने हेर्न बाँकी नै छ।
