काठमाडौं । नेपाली बजारमा सुनको मूल्य फेरि उकालो लागेको छ। आइतबार छापावाल सुनको मूल्य प्रतितोला ३ लाख १९ हजार ५ सय रुपैयाँ पुगेको छ। यो अघिल्लो कारोबार दिनको तुलनामा २ हजार ८ सय रुपैयाँले बढी हो।
शुक्रबार छापावाल सुन प्रतितोला ३ लाख १६ हजार ७ सय रुपैयाँमा कारोबार भएको थियो। पछिल्लो वृद्धिसँगै सुनको मूल्य फेरि ३ लाख २० हजार रुपैयाँको नजिक पुगेको छ।
यस्तै, चाँदीको मूल्य प्रतितोला ४ हजार ९ सय ७५ रुपैयाँ कायम भएको छ। अघिल्लो कारोबार दिन चाँदी ४ हजार ९ सय ८५ रुपैयाँमा कारोबार भएको थियो।
सुनको मूल्यमा भइरहेको निरन्तर उतारचढावले गहना खरिद गर्ने उपभोक्तादेखि सुनमा लगानी गर्नेहरूलाई समेत प्रत्यक्ष असर पारिरहेको छ। विशेषगरी विवाह तथा चाडपर्वको समयमा सुनको माग बढ्ने भएकाले मूल्यमा हुने सामान्य परिवर्तनले पनि उपभोक्ताको बजेट प्रभावित हुने गर्छ।
अन्तर्राष्ट्रिय बजारमा सुनको मूल्य, अमेरिकी डलरको विनिमय दर तथा माग–आपूर्तिको अवस्थालगायतका कारणले नेपाली बजारमा सुनको मूल्य प्रभावित हुने गरेको छ।
