काठमाडौं । पूर्वी पहाडी जिल्लामा लगातार भइरहेको वर्षाका कारण सप्तकोशी नदीमा पानीको बहाव तीव्र रूपमा बढेको छ। सोमबार दिउँसो १२ः१५ बजे गरिएको मापनअनुसार कोशी ब्यारेजमा २ लाख ७ हजार ४३५ क्युसेक प्रतिसेकेन्ड पानीको बहाव पुगेको सुनसरी प्रहरीले जनाएको छ।
बहाव बढेसँगै सम्भावित जोखिमलाई मध्यनजर गर्दै कोशी ब्यारेजमा रातो बत्ती बालिएको छ भने रातो झण्डासमेत फहराइएको छ। ब्यारेजका ५२ मुख्य र ४ नहरसहित कुल ५६ ढोकामध्ये हाल २४ वटा ढोका खोलिएका छन्।
प्रहरीका अनुसार सप्तकोशीको जलसतह र बहावको अवस्था निरन्तर निगरानीमा राखिएको छ। नदी तटीय तथा जोखिमयुक्त क्षेत्रमा बसोबास गर्ने स्थानीयलाई विशेष सतर्कता अपनाउन, सुरक्षित स्थानमा रहन र नदी किनारमा अनावश्यक गतिविधि नगर्न आग्रह गरिएको छ।
लगातार वर्षा भइरहेकाले सप्तकोशीको बहाव अझ बढ्न सक्ने सम्भावना रहेको भन्दै सम्बन्धित निकायले तटीय क्षेत्रका बासिन्दालाई सतर्क रहन अनुरोध गरेका छन्।
