काठमाडौं। सरकारले विभिन्न नीतिगत, प्रशासनिक तथा संस्थागत विषयसँग सम्बन्धित सात महत्वपूर्ण निर्णय सार्वजनिक गरेको छ। सरकारका निर्णय सार्वजनिक गर्दै सरकारका प्रवक्ता तथा शिक्षा, विज्ञान तथा खेलकुदमन्त्री सस्मित पोखरेलले सुनसरी र सिराहामा भएको प्रदर्शनका क्रममा मृत्यु हुनेका परिवारलाई क्षतिपूर्ति तथा घाइतेहरूको उपचार र राहतको व्यवस्था गर्ने निर्णय भएको जानकारी दिए।

सरकारले गरेका निर्णयहरू यस्ता छन्–

• तथ्याङ्क (पहिलो संशोधन) नियमावली, २०८१ स्वीकृत गर्ने।
• लगानी बोर्डको प्रमुख कार्यकारी अधिकृत (सीईओ) पदमा याङ्की उक्याबलाई नियुक्त गर्ने।
• नेपाल इन्टरमोडल यातायात विकास समिति गठन आदेश, २०५४ खारेज गर्ने तथा उक्त समितिलाई नेपाल पारवहन तथा गोदाम व्यवस्था कम्पनी लिमिटेडसँग गाभ्न स्वीकृति दिने।
• पशु बधशाला र मासु जाँच ऐन, २०५५ लाई चरणबद्ध रूपमा देशभर लागू गर्ने।
• बालबालिका सम्बन्धी (पहिलो संशोधन) विधेयक, २०८१ सङ्घीय संसदमा पेश गर्न स्वीकृति प्रदान गर्ने।
• विश्वविद्यालय अनुदान आयोगको रिक्त अध्यक्ष पदमा प्रा. डा. खड्गबहादुर केसी र सचिव पदमा प्रा. डा. रोजिश श्रेष्ठलाई नियुक्त गर्ने।
• सुनसरी र सिराहामा भएको प्रदर्शनका क्रममा मृत्यु हुनेका परिवारलाई क्षतिपूर्ति तथा घाइतेलाई राहत र उपचारको व्यवस्था गर्ने।

प्रवक्ता पोखरेलका अनुसार यी निर्णय मन्त्रिपरिषद् बैठकले गरेको हो। उनले सम्बन्धित निकायलाई निर्णय कार्यान्वयनका लागि आवश्यक प्रक्रिया अघि बढाउन निर्देशन दिइएको पनि जानकारी दिए।