काठमाडौं । दसैं नजिकिँदै जाँदा काठमाडौंका प्रमुख व्यापारिक केन्द्र असन र न्युरोड बजारमा किनमेल गर्ने ग्राहकको चहलपहल बढ्न थालेको छ। चाडपर्वका लागि आवश्यक सामग्री खरिद गर्न उपभोक्ताहरू बजार पुग्न थालेपछि पसलहरूमा समेत व्यस्तता बढेको छ।

दसैंलाई लक्षित गर्दै ग्राहकहरू नयाँ लुगा, जुत्ता, खाद्यान्न, मसला तथा पूजाआजाका सामग्री खरिद गर्न असन बजार पुगिरहेका छन्। विशेषगरी दसैंमा परिवारका सदस्यका लागि लत्ताकपडा तथा घरायसी सामान किन्ने परम्पराका कारण बजारमा किनमेलको रौनक थपिन थालेको हो।

काठमाडौंको पुरानो व्यापारिक केन्द्रका रूपमा परिचित असन बजार दसैंको समयमा किनमेलका लागि आकर्षक गन्तव्य मानिन्छ। हरेक वर्ष दसैं नजिकिएसँगै यहाँ ग्राहकको भीड बढ्ने गरेकोमा यस वर्ष पनि बजारमा चहलपहल विस्तारै बढ्न थालेको छ।