सामाजिक सञ्जालमा गायक अशोक दर्जीलाई कुटपिट गरिएको भिडिओ सार्वजनिक भएपछि उनले आफूलाई योजनाबद्ध रूपमा फसाइएको भन्दै प्रहरीमा उजुरी दिएका छन् ।
आफूमाथि अन्याय भएको र योजनाबद्ध रूपमा फसाइएको भन्दै गायक दर्जीले इलाका प्रहरी कार्यालय अनारमनी, झापामा दिएको लिखित निवेदनसमेत सार्वजनिक भएको छ ।
अभियन्ता विनयजंग कुँवर र पूजा कुँवरले हिजो राति केही सेकेन्ड लामो उक्त भिडिओ सामाजिक सञ्जालमा सेयर गरेका थिए । उनीहरूले भिडिओको स्रोत खुलाएका छैनन् । उनीहरूले अशोक खराब संगतमा परेको दाबी गरेका छन् ।
सार्वजनिक भिडिओमा केही व्यक्तिले अशोकलाई घेरेर कुटपिट गरेको र पैसाको लेनदेनका विषयमा आरोप लगाएको देखिन्छ ।
तर, अशोक दर्जीले भने उक्त घटना करिब एक महिनाअघि आफूलाई योजनाबद्ध रूपमा फसाउन गरिएको ‘ट्र्याप’ भएको दाबी गरेका छन् ।
उनले प्रहरीमा दिएको निवेदनअनुसार, करिब एक महिनाअघि बिर्तामोडस्थित मावली घर गएको समयमा महानन्द चोकनजिकै साथीहरूसँग खाजा खाइरहेका थिए । सोही क्रममा ‘अङ्कित’ नामका साथीले ‘काजी दाइ’सँग १ हजार रुपैयाँ लिएर भित्री गल्लीमा गएको निवेदनमा उल्लेख छ ।
घटनाको करिब एक सातापछि देवीबस्ती गेटनजिक स्कुटीमा पेट्रोल हालिरहेको अवस्थामा अङ्कित, शशांक प्रधान र ‘गुन्द्रुक’ भनिने व्यक्तिले आफूलाई घेरेको दर्जीले बताएका छन् ।
उनीहरूले १ हजार रुपैयाँ चोरी गरेको आरोप लगाउँदै कुटपिट गरेको र सोही क्रममा मोबाइलबाट भिडिओ खिचेको उनको निवेदनमा उल्लेख छ ।
दर्जीले उक्त भिडिओ नियोजित रूपमा बनाएर सामाजिक सञ्जालमा फैलाइएको र त्यसबाट आफ्नो सामाजिक प्रतिष्ठा तथा भविष्यमा असर परेको दाबी गरेका छन् । भिडिओ हटाउन पटक–पटक आग्रह गर्दा आफूलाई धम्कीसमेत दिइएको उनको गुनासो छ ।
‘मेरो सामाजिक प्रतिष्ठा र भविष्यमाथि गम्भीर चोट पुर्याइएको छ । ती व्यक्तिहरूलाई पक्राउ गरी कानुनी कारबाही गरियोस् र मलाई न्याय दिलाइयोस्,’ उनले निवेदनमा माग गरेका छन् ।
भिडिओ सार्वजनिक भएपछि सामाजिक सञ्जालमा अशोक दर्जीको अवस्थाप्रति चिन्ता व्यक्त भइरहेको छ । भिडिओमा उनी डराएको र निरीह अवस्थामा देखिएका छन् ।
सानै उमेरमा चर्चामा आएका कलाकारलाई संरक्षण गर्नुको सट्टा दुर्व्यवहार गरिएको भन्दै धेरैले सामाजिक सञ्जालमा दुःख व्यक्त गरेका छन् ।
अशोक दर्जी सानै उमेरमा भाइरल भएपछि संगीतकार टंक बुढाथोकीले उनलाई संरक्षण गरेका थिए । टंक बुढाथोकीको संगीतमा अशोकले गाएको ‘मन बिनाको धन’ गीत चर्चित बनेको थियो ।
हालै उनी टंक बुढाथोकीको साथ छोडेर परिवारमा फर्किएका छन् । अशोक दर्जीले गायनसँगै चलचित्रमा पनि काम गरिरहेका छन् ।
